lifeline

Kuchh rekhaon ka aaroh-avroh hi tha,
Jisne use sthir rakha tha.
Shyya par leti woh thi,
Chanchal main tha.
Mere sparsh ki garmahat na use mili,
Na mere shabdon ka koi vidroh tha.
Uske shesh astitva ka eklauta praman
Bas wahi……….
Kuchh rekhaon ka aaroh-avroh.

Ashru aur lochan ka ghamasan adig.
Ya tu jhapak ya to tapak.
Ab haar kaun mane?
Jhapak liya toh kho diya,
Tapka, to bhi kho diya.
Isliye dhairya bandhe dekh raha tha,
Kuchh rekhaon ko aaroh-avroh.

Mere paanjar ki chand rekhaon mein,
Tumhara bhi naam likha hai.
Likha hai jeevan-mrityu ka sang.
Kya, iska jhootlana bhi likha hai?
Ab inse aas kya lagau,
Na Kalma padhu na, na bhog chadhau.
Aas hai to toh,
Kuchh rekhaon ka aaroh-avroh.

Ungli kheenchi toh, yaad aaya.
Tumhara ek ansh to abhi bhi baki hai mere paas.
Parinay sood humara usmein,
Mera lahu aur saya tumhara  usmein.
Tum aaj hi tar jao is lok se
Aur rakhna humein apne aanchal tale.
Nashvar ang se chir Aks bada.
Toh, ab kyun dekhun??
Kuchh rekhaon ka aaroh-avroh.

Sahsa meri ungli par kheechav badha.
Woh chad gayi us shyya pe.
Dekha maine putri-janani ka divya milan.
Ab rekhaein sthir,
Aur Spandan sparsh: Viram.

Advertisements